Psa 94 | MMX | STEP | Leeme Silok, nenu ne Moroa uk lox asongot limixin kapmek; una lox asuusu lebelemamao ram tidi!

Psalms 94

Moroa Ni Laradi Naba Ila Limixin Axap

1 Leeme Silok, nenu ne Moroa uk lox asongot limixin kapmek; una lox asuusu lebelemamao ram tidi! 2 Nenu laradi ila mumu lorooro at limixin axap; una xatu kaxat la una raba nedi luvuttadi loklox aaso mi luunun ti laxakapmek atdi! 3 Mo leklek ap mo limixin dik lok laxapmek naba se ba ua? Naba se ba ua, Leeme Silok? 4 Mo loklox aaso at luvuttadi dit los polo Lenavolo naba xap ba lingisa la dirak lox aru di mumu leveloklok kakapmek atnedi?

5 O Leeme Silok, di rubut puuvus limixin taram, ; la dik lok li levenmumuat mavana atnedi no nenu u ruuna di. 6 Dip sev amet lempatnaa mi lubungkarun, la dip sev amet bok lavaose mo dik lok at na lenep kangka atnema. 7 La di paase xeretna do, “Leeme Silok ni kopmen na reven nedik; ne Moroa me Israel ixo ven lenget ka na loklok tak lox i.”

8 Limixin tarak, kereva rinotno la mik lok sorova baulang gamasa? Minabaklen ba lingisa? 9 Moroa ga lok levenbaalung atnedik; kereva, neni ixo epovo na ronga? Neni ga lok lengkatli atdik; kopla ni noxo reven? 10 Neni i metlaat ti laranep silok petpes, kereva ni noxo lox asongot di? Neni laradi anasa at limixin axap, kereva, kopmen takleklen teren? 11 Leeme Silok iklen axap levendoxoma atnedi; la iklen latnese at levendoxoma etaba atdi.

12 Leeme Silok, lomomo silok mene i mo ik lok ap mo laradi ua nenu u paase aru amisix i, mo laradi ua nenu u anasa amisix i mi Lenavolo ram! 13 Uk lox amamana i basinge levenaleng at levenmumuat, ise at laaleng di xe lavatmet tik lixo luvuttadi dik lok laxapmek. 14 Leeme Silok noxo raba aralu limixin teren; neni noxo lox abulubun nedi ua neni i ruuna di. 15 Levendoxoma mokmokso naba ravasu xeneng at levenaleng dina tu at lavapaase. La limixin mokmokso axap diba su auru rino mo levendoxoma.

16 Nege ga ru katling ia ri ru tangarang mo limixin kapmek? Nege ga lok ka loxot tarak kusu ri ru tangarang mo limixin bilinga? 17 Mo do Leeme Silok gitoxo lok tooro ia, nia ro agita onon soso vam uto Katimun at lenep kangka at lavaanat pamngus. 18 Aga vaase xeretna, “Am subu si na ukopok.” Ketla, labalamu lexen taram, Leeme Silok, im tebeng ama aurut ia. 19 At levenaleng nia a suma levenmumuat la arak lok tuntun, nenu uk lox amenemen ia la urak lox aklek ia.

20 Nenu kopmen nak lok momo mi luvuttadi rongtonga linga gesenep ua di xaxarang pepe lolos tinotno luvukat at levenaleng ete, la di sisiam ka laxakapmek. 21 Dik lok li levenmumuat mavana at luvuttadi avukat, la di tong aurut liina ti luvuttadi sepsen. 22 Ketla Leeme Silok ik lok ngan lentupe rak; ne Moroa rak i kox ia basinge di. 23 Neni naba lox asongot di mumu mo leveloklok kakapmek atnedi. La ni naba sele utut di mumu mo libilinga atnedi; Leeme Silok ne Moroa atnedik naba lok pes axap tino di.